Предвремени избори може да има само доколку опозицијата се согласи да гласа за уставните измени и потоа да распише предвремени избори. Ова е единствената опција што Владата би ја прифатила, вели вицепремиерот одговорен за европски прашања Бојан Маричиќ во интервју за „Гласот на Америка“.
– Мислам дека не е време за предвремени избори, туку време е да преземеме одговорност и да ги спроведеме нашите обврски. Граѓаните ќе ни бидат благодарни доколку ја исполниме обврската пред изборите, за да не се преоптоваруваат изборите со тоа кој е за, а кој е против уставните измени, бидејќи тоа ќе не доведе до нов десетгодишен тунел, од кој не знаеме дали можеме да излеземе порано од 10 години. Не е време за предвремени избори, време е да се носат одлуки – вели Маричиќ, која е во посета на САД.
За ставот на ВМРО-ДПМНЕ дека нема да мрдне од своите позиции, ако има план Б и ако е во Вашингтон да бара поддршка од стратешкиот сојузник – САД, вели дека ја имаме поддршката од сојузниците, но не за било кој план Б.
– Доаѓа поддршка од сите, но само за планот А. Ова е единствениот план што го имаме, а тоа е завршување на уставните измени, продолжување на преговорите со ЕУ и членство на Македонија до 2030 година. Секоја партија, секој политичар кој се противи на ова ќе сноси историска одговорност за неговиот евентуален неуспех. Сигурен сум дека имаме доволно време до ноември да ја убедиме целата пратеничка група или дел од пратеничката група на опозицијата да гласаат за овој предлог, бидејќи инвестицијата е превисока за да се пропушти оваа шанса. Дури и пратениците на ВМРО-ДПМНЕ и партијата мора да одговорат зошто работат на губење на оваа шанса, бидејќи следната година ќе имаме друг контекст и ќе доцниме. Веќе чекавме 17 години за да започнеме разговори – рече Маричиќ.
Според него, постои чувство дека е нарушен консензусот за ЕУ, бидејќи ВМРО-ДПМНЕ зазеде многу цврст став да не ги поддржи уставните измени.
– Не можеме да бидеме само декларативни за ЕУ, тоа треба да го покажеме на дело. Денеска се уставните измени и утре ќе има многу други одлуки за кои ќе треба двотретинско мнозинство и се поврзани со конкретни европски политики, без разлика дали се работи за судството или за други сегменти – вели Маричиќ.
