Холандскиот премиер Марк Руте објави во петокот вечерта дека неговата коалициска влада поднесува оставка поради непомирливите разлики во имиграциската политика.
„Вечерва, за жал, дојдовме до заклучок дека разликите се непомирливи. Затоа наскоро ќе му поднесам оставка на кралот во име на целата влада“, рече Руте на прес-конференција доцна во петокот.
Лидерите на четирите коалициски партии во петокот одржаа кризна средба, но не беше постигнат договор. Точка на спор, велат изворите, е прашањето до кој степен на бегалците кои веќе се во Холандија би можеле да им се придружат членовите на семејствата.
Тензиите достигнаа врв оваа недела откако Руте побара да се ограничи влезот на децата од воените бегалци кои веќе се во Холандија и дека семејствата мора да чекаат најмалку две години пред да се обединат.
Христијанската унија и либералната Д66 воопшто не сакаа да го прифатат ова.
Ова беше четврта влада на Руте. Тој беше премиер 13 години, втор најдолг мандат во ЕУ по Виктор Орбан.
Последната влада успеа да ја формира дури по девет месеци преговори. Се состоеше од десно-либералната ВВД, лево-либералната Д66, Христијанско-демократската партија ЦДА и помалата Христијанска унија.
Барањата за азил во Холандија минатата година се зголемија за една третина, а до крајот на годината може да има повеќе од 70.000, што е најмногу од 2015 година.
Ова повторно би ги оптоварувало капацитетите за азил во Холандија, каде што условите често биле нехигиенски поради пренатрупаноста.
Минатата година Руте рече дека се срами поради тоа, откако хуманитарната група Лекари без граници испрати тим во Холандија за прв пат во историјата да помогне во медицинските потреби на мигрантите.
Тој вети дека ќе ги подобри условите во објектите, но има намера тоа да го направи со намалување на бројот на бегалци. За ова не успеа да ја добие поддршката од коалиционите партнери кои веруваа дека неговата политика отишла предалеку.
Руте рече дека жали што мора да поднесе оставка, но тоа го опиша како „политичка реалност“.
Тој не додаде дали повторно ќе се кандидира на новите избори кои се очекуваат наесен. Дотогаш тој ќе ја води државата во технички мандат.
БББ
Во последните месеци рејтингот на владејачката партија нагло падна поради бројните кризи.
На локалните избори во март сите владејачки партии забележаа значителни загуби.
Голем победник на тие избори беше десничарското популистичко Движење на земјоделци-граѓани (БББ). БББ се предвидува да биде многу успешна на претстојните парламентарни избори.
Партијата се здоби со популарност во последниве месеци како глас на противењето на владините еколошки регулативи за намалување на нивото на емисиите на азот. Против мерките земјоделците протестираа неколку години, понекогаш и насилно.
