Невладината организација за човекови права „Хјуман рајтс воч“ (Human Rights Watch) соопшти дека се појавиле докази дека Украина неселективно користи забранети противпешадиски мини.
Меѓународната невладина организација документирала 11 цивилни жртви, вклучително и една смрт и повеќекратни ампутации на нозете, од мини „ливчиња“ или „пеперутки“, за кои тврдеше дека Украина лани ги испукала со ракета врз територијата окупирана од Русија во близина на источниот град Изјум.
Нагазните мини можат да нанесат разорна жртва на цивилното население долго по завршувањето на конфликтот. Противпешадиските мини PFM-1, за кои ХРВ објави дека Украина ги лансирала во областите под контрола на Русија, се мали пластични експлозивни мини, кои се активираат кога ќе се притисне – на пример, ако некој стапне врз нив.
ХРВ ја повика украинската Влада да ги почитува преземените обврски и не користи такво оружје, како и да побара одговорност од тие што употребуваат забрането оружје.
„Наодите беа проследени до украинската Влада минатиот месец, но досега не добивме одговор“, соопшти ХРВ.
Украина во 2005 година го ратификуваше меѓународен договор од 1997 година со кој се забранува употреба на нагазни мини и требаше да ги уништи резервите.
Русија не се приклучи на договорот, но нејзината употреба на противпешадиски мини го прекршува меѓународното хуманитарно право, бидејќи тоа е неселективно оружје, соопшти ХРВ.
Противпешадиските мини се активираат при контакт или непосредна близина и можат да бидат фатални за цивилите долго време по завршувањето на конфликтот.
