Говорот на српскиот претседател Александар Вучиќ по протестот „Србија против насилството“ одржан во саботата во Белград, кој многумина го споредија со говорот на хашкиот обвинет Слободан Милошевиќ, предизвика бројни реакции.
Форин полиси истакнува дека „Вучиќ секогаш ги фалел и никогаш не престанал да верува во идеите на Милошевиќ“.
„Целосно во согласност со она за што се залага тоталитарниот режим во Белград. Проблемот е што ЕУ и САД одбиваат да го признаат ова. Неколку геноциди не беа доволни. Мора да учиме од историјата“, вели ФП.
Политикологот Јасмин Мујановиќ вели дека тоа не е чудно бидејќи Вучиќ бил ученик на Милошевиќ.
„Паралелите меѓу Вучиќ и Милошевиќ остануваат истакнати. Не е чудно, бидејќи Вучиќ беше неговиот највнимателен ученик. Но, и покрај големите антивладини протести во Белград, се плашам дека неговиот режим е сè уште премногу силен, без знаци на клучни внатрешни фрактури, за да биде соборен“, рече Мујановиќ.
Косовската парламентарка Фиторе Пацоли истакна дека Вучиќ сега почнал да ја користи реториката на Милошевиќ.
„Тој беше министер за пропаганда за време на војната во Косово, не е ни чудо што дели карактеристики и сличности со Милошевиќ“, рече таа.
Се огласи и косовскиот политичар Адмирим Алити.
„Кој го кажа тоа, Вучиќ или Милошевиќ? Да. Автократот Вучиќ го прифаќа омразниот, ксенофобичен менталитет на жртвата на неговиот поранешен шеф, геноцидниот Милошевиќ, додека се обидува да ги задуши протестите во Србија и да го дестабилизира Косово. Речиси од збор до збор“, изјави тој.
Други корисници на Твитер се прашуваа дали е можна таква случајност.
Да потсетиме, Вучиќ го кажа следново: „И некои аутсајдери не ја уништуваат Србија поради Вучиќ, туку уништуваат некој Вучиќ поради Србија“. Истото го кажа и Слободан Милошевиќ во октомври 2000 година, пред да биде сменет од власт, објави на Твитер претседателот на Извршниот одбор на Регионалната академија за развој на демократијата, Балша Божовиќ.
„Тие не ја напаѓаат Србија поради Милошевиќ, туку го напаѓаат Милошевиќ поради Србија“, се слуша во говорот на поранешниот претседател на СРЈ, Слободан Милошевиќ. Дваесет и три години подоцна, Вучиќ го повторува истото: „И не дека некој од надвор ја уништува Србија поради Вучиќ, туку уништува некој Вучиќ поради Србија“.
И претседателот на Партијата за слобода и правда (СПП), Драган Ѓилас, потсети на овие два говори – детал од „последното обраќање на Милошевиќ како претседател на СРЈ“ и денешното обраќање на Вучиќ.
