Кинескиот министер за одбрана Ли Шангфу во неделата ги предупреди САД да не се мешаат во спорот со Тајван, заканувајќи се со употреба на сила.
-„Ако некој се осмели да го одвои Тајван од Кина, кинеската војска нема да се двоуми ниту една секунда“, рече Ли во говорот на Шангри-Ла дијалогот во Сингапур, конференција организирана од Меѓународниот институт за стратешки студии.
„Нема да се плашиме од нашите противници и решително ќе го заштитиме националниот суверенитет и територијалниот интегритет без разлика на цената“, рече тој.
Тајван е независен од 1949 година, но Кина ја смета самоуправната демократија за кинеска територија.
Ли ја критикуваше американската продажба на оружје и воена обука на Тајван, како и подобрувањето на односите Вашингтон-Тајпеј. „Тајван е внатрешна работа на Кина“, рече министерот во своето прво појавување на безбедносната конференција. Тајван е кинески Тајван, а како да се реши проблемот со Тајван е работа на Кинезите. „Секој чин на замаглување на принципот на една Кина е и апсурден и опасен“, продолжи министерот.
„Повторното обединување на Кина е најважниот историски тренд и незапирлива насока“, рече Ли. „Ќе ја следиме перспективата за мирно обединување со најголема искреност и најголеми напори. Но, ние не ветуваме дека ќе се откажеме од употребата на сила. Ако некој се осмели да го одвои Тајван од Кина, кинеската војска нема да се двоуми ни секунда“.
Ли рече дека односите на Пекинг со Вашингтон се на „рекордно ниско ниво“ од почетокот на односите во 1979 година.
Што се однесува до недостигот на комуникација, за што САД се повеќе се жалат, генералот рече дека Кина во принцип е отворена за разговори меѓу двете сили, но само доколку тие се „засноваат на меѓусебно почитување“.
Ли го одби барањето на САД да се сретне со американскиот секретар за одбрана Лојд Остин на маргините на конференцијата.
Дијалогот Шангри-Ла на ниво на министри за одбрана се смета за најважен безбедносен форум во регионот. Четириесет земји испратија свои претставници.
Односите меѓу Кина и САД паднаа на ниско ниво по соборувањето на кинескиот шпионски балон во февруари и откажувањето на посетата на американскиот државен секретар Антони Блинкен на Кина.
