Имаме 1.500 лица со мултипла склероза и сакам да истакнам дека не се сами. Нивните приказни нè инспирираат да поттикнеме поинклузивно општество, изјави денеска министерот за здравство Фатмир Меџити, на настанот организиран од Националното здружение за помош и поддршка на лица со мултипла склероза, а по повод одбележувањето на Светскиот ден на мултипла склероза.
Претседателката на Националното здружение за мултипла склероза, Ана Карајанова Димитрушева, нагласи дека повеќе од 50 пациенти се на листата на чекање за терапија.
– Ги поздравувам заложбите на здравствените власти во соработка со тимот од Универзитетска клиника за неврологија, за зголемување на бројот на лица со мултипла склероза кои примаат ефикасна терапија во изминатиот период, но и покрај тоа соочени сме со недостапност на оваа терапија за голем број пациенти со мултипла склероза, кои веќе се поставени на терапија. Во слична ситуација се и оние кои чекаат со месеци, да добијат современ третман – истакна таа, нагласувајќи дека причината е во недоволниот буџет, додавајќи дека бројот на нови случаи расте, секоја година се дијагностицираат нови 90 до 120 пациенти.
Карајанова Димитрушева нагласи дека е неопходен поголем буџет и ажурирање на позитивната листа на лекови.
– Ние во делот на мултипла склероза, јас како невролог професионалец ви тврдам со одговорност, дека сме најдобри во регионот за обезбедување на терапијата. И ќе продолжиме, ќе се стремиме што повеќе пациенти да вклучиме и бројот што чекаат не е голем. Ние точно ја одредуваме дијагнозата и кога треба да се почне со терапијата. Имаме нормално и модулаторна терапија, првите симптоми, прво одлучуваме како што – тоа е професионално меѓу нас на неврологија, но ви кажувам и ви тврдам со одговорност дека сме најдобри во околината, во регионот – рече министерот Меџити, одговарајќи на новинарско прашање.
Заменик министерот за труд и социјална политика Енвер Хусејин најави дека Министерството за труд и социјална политика во следниот период ќе организира серија јавни презентации за новиот модел на проценка на попреченоста, а кон обезбедување право на вработување.
– Со оваа реформа, како што напоменав, ќе се воведе систем на професионална рехабилитација и работно оспособување на лицата на кои им е потребно тоа, а пред сѐ на лицата со попреченост, кои треба да станат конкуренти на пазарот и со тоа да се вработат, но и да го задржат своето вработување. Сакам да честитам на сите лица кои се соочуваат со оваа состојба, за храброста и за истрајноста. Отвореноста за гласно и храбро да се говори за личната здравствена состојба е голема доблест и знам дека таквите лични приказни претставуваат инспирација за сите останати – нагласи Хусеин.
Елизабета Ѓоргиевска, сопругата на претседателот Стево Пендаровски, рече дека Македонија со околу 1.500 лица кои боледуваат од мултипла склероза, спаѓа помеѓу земјите од висок ризик. Болеста е за трипати повеќе раширена кај женската популација.
– Она што ја прави оваа болест особено опасна е фактот дека иако дијагностицирана пред 150 години, лек за оваа болест сѐ уште нема, ниту пак е откриен причинителот на мултипла склероза. Сево ова несомнено ги става сите заболени во особено тешка состојба и нивниот живот е исполнет со постојана борба и неизвесност – рече Ѓоргиевска и додаде дека болеста е тешка и непредвидлива, бара постојана борба и терапии, а суштествена е психолошката поддршка на пациентите, но и на нивните семејства.
