Се расчистува просторот на објектот на поранешен „Технометал – Вардар“ близу улица Македонија, соопшти Општина Центар. Сопственикот на „Буши фашион“ и сопственик на објектот на поранешен „Технометал – Вардар“ почна да постапува по решението од Општина Центар и го расчистува просторот од некогашната компанија за трговија со мермер, челик, обоени метали и неметали, опрема, машини и друго. Општина Центар неколкупати досега го казни сопственикот по што му наложи самостојно да ја расчисти депонијата и секојдневно да ја одржува хигиената.
„Секторот за инспекциски работи на Општина Центар во февруари преку Решение го задолжи сопственикот да исчисти и постапи во законски предвиден рок. Решението за расчистување секторот го издаде поради спречување на создавање еколошка катастрофа предизвикана од секојдневно собирање купишта отпад создаден од кршење на инвентарот и екстериерот на огромната бетонска зграда. Минатата година во овој објект избувна пожар, а неколкупати досега жителите од околните згради пријавуваат и кражби“, соопшти Општината.
Општина Центар најави дека Секторот за инспекциски работи и во наредниот период ќе продолжи со инспекциски контроли преку инспекцијата за животна средина за да не се повтори грдата слика и нарушувањето на мирот на станарите.
