Сирупот од глуварче има сличен вкус на традиционалниот мед и лесно може да се вклопи во вашата исхрана.
Глуварчето е растение кое напролет покрива ливади и тревници. Долго време се сметаше за бескорисен плевел, но денес знаеме дека содржи многу корисни соединенија кои благотворно делуваат на нашиот организам.
Медот од глуварче не е производ на пчели, туку сируп направен од цвеќиња, вода и шеќер. Неговата конзистентност е потенка од повеќето видови вистински мед, но по изглед и боја е слична на пчелниот мед.
Има изненадувачки сличен вкус на традиционалниот мед, така што лесно може да се вклопи во вашата исхрана. Тој е одлична замена за медот за веганите или за оние кои се алергични на пчелен мед.
Тој е одличен додаток на тост, колачи, палачинки и може да се користи на ист начин како медот, во чај и други пијалоци.
Собирање на глуварче
Собирањето глуварчиња е релативно едноставен процес. Цветовите се берат во текот на април и мај на ливади далеку од патиштата.
Топлото, сончево и суво време е идеално за берење цвеќе. Се препорачува да се користат веднаш по бербата, бидејќи така најдобро ќе се зачуваат нивните лековити својства.
Подготовка
За да го подготвите овој сладок сируп, ќе ви требаат цветови од глуварче, вода, шеќер, лимон, тенџере за готвење, дрвена канта за мешање, цедалка и крпа за цедење.
Најпрво убаво измијте ги цветовите од глуварчето и отстранете ги зелените делови, оставајќи ги само жолтите ливчиња. Отстранувањето на зелените делови кои ги држат ливчињата не е неопходно, но се препорачува бидејќи можат да имаат горчлив и несакан вкус, пишува Index.hr.
Потоа во поголем сад ставете ги ливчињата од глуварче и прелијте ги со врела вода, па оставете ги да киснат преку ноќ. Следниот ден процедете ја течноста низ цедалка и газа, па додајте шеќер и лимон исечкан на кришки. Загрејте ја смесата на умерена температура, повремено мешајќи додека шеќерот целосно не се раствори.
Намалете ја температурата и варете ја смесата околу еден час, повремено мешајќи додека не се згусне и добие конзистенција како мед. Кога сирупот ќе се олади, ставете го во стаклени тегли и чувајте го на суво и ладно место.
