Конзервативната политичка партија на Тајланд се обидува да ги придобие гласачите пред општите избори во мај со ветување дека ќе ги легализира секс играчките, наведувајќи ги фискалните и другите неверојатни придобивки.
И покрај неговата репутација како една од сексуално најслободните земји во Југоисточна Азија, Тајланд со мнозинство будисти сè уште е конзервативен, со вибратори и други слични сексуални помагала нелегални.
Демократската партија е главен играч во тајландската политика од 1940-тите, но претрпе назадување на изборите во 2019 година, а неодамнешните анкети покажаа дека нејзината популарност значително опадна. Изборите ќе се одржат на 14 мај.
„Сексуалните играчки се корисни затоа што може да резултираат со намалување на проституцијата, како и со помалку разводи поради неусогласеност на сексуалното либидо и злосторства поврзани со секс“, рече претставничката на партијата Рачада Танадирек.
Таа додаде дека владата пропушта можност да собира даноци за легалниот увоз на еротски стимуланси.
И додека секс играчките се сметаат за „неморални“ во некои делови на Тајланд, многу од нив сè уште нелегално се увезуваат во кралството од странство, се вели во соопштението на партијата.
Секој кој е осуден за нивна продажба се соочува со затворска казна до три години или парична казна до 1.800 долари, иако таквите играчки се слободно достапни од уличните тезги во некои области во Бангкок.
Рачада рече дека во моментов нема контрола на квалитетот на увезените секс играчки, кои често се небезбедни или опасни за употреба.
Демократската партија во предизборната кампања нагласува дека поддржува легализација на вакви предмети за лица над 18 години.
Станува збор за најстарата тајландска партија, која имала четворица премиери. Последниот, Абисит Вејахива, ја водеше владата од 2008 до 2011 година.
Но, популарноста на партијата опадна на контроверзните избори во 2019 година, кога лидерот на пучот Прајут Чан-о-Ча беше именуван за премиер.
Сегашните анкети покажуваат дека Демократската партија има значително помалку од 10 проценти од поддршката на населението.
Партијата минатата година беше вмешана во секс скандал. Тогаш 14 жени поднесоа официјални жалби против поранешниот заменик-претседател на партијата, Прин Паничпакди.
Тој ги негира обвиненијата, кои се уште се чекаат на суд.
