Канадската полиција истражува кражба на злато и вредни предмети во вредност од околу 13,5 милиони евра од аеродромот во Торонто.
Златото и многу скапите предмети пристигнаа во понеделникот вечерта со авион и беа истоварени во хангарот, изјави претставник на локалната полиција и додаде дека исчезнувањето на пратката било брзо констатирано.
Контејнерот во кој се наоѓале вредните предмети е украден од магацинот, изјави службеникот на прес-конференцијата.
Детали за начинот на кражба и осомничените не се соопштени.
Медиумите објавија дека од аеродромот „испариле“ повеќе од 1,6 тони злато, што би имало многу поголема вредност од 20-те милиони канадски долари (13,5 милиони евра), за кои властите велат дека вредела скапата пратка.
