Министерството за надворешни работи на Кина соопшти дека засега нема информации за потенцијална средба меѓу кинескиот лидер Си Џинпинг и украинскиот претседател Володимир Зеленски.
– За прашањето за Украина, Кина одржуваше комуникација со релевантните страни, но немам информации за конкретното прашање – изјави Мао Нинг, официјалниот претставник на кинеската дипломатска служба.
Претходно беше објавено дека кинескиот лидер Си Џинпинг планира да разговара со украинскиот претседател Володимир Зеленски веднаш по неговата посета на Москва, но тоа не се случи.
Зеленски денеска го покани Си Џинпинг да ја посети Украина и нагласи дека победата на неговата земја во војната со Русија во голема мера зависи од помошта што доаѓа од САД и западните сојузници.
Зеленски го посети северниот регион Суми и на тој начин ја продолжи турнејата низ делови од земјата кои претрпеа поголема штета од руската агресија, а во интервју за АП, чии новинари го следеа Зеленски на ова патување, тој го покани кинескиот претседател Си Џинпинг да ја посети Украина.
– Подготвени сме да го видиме овде. Сакам да разговарам со него. Имав контакт со него пред руската агресија, но не разговаравме повеќе од една година – рече Зеленски.
Кинескиот претседател Си разговараше со рускиот претседател Владимир Путин во Москва минатата недела, а Пекинг неодамна објави документ во кој повикува на продолжување на мировните преговори, укинување на едностраните санкции и изразување противење на употребата на нуклеарно оружје.
