Германскиот аеродром во Минхен е принуден да ги откаже сите редовни летови закажани за недела и понеделник поради штрајкот.
„Во недела, 26 март и понеделник, 27 март 2023 година, на аеродромот во Минхен нема да има редовен патнички сообраќај поради целодневните штрајкови“, се вели во соопштението на аеродромската управа.
Патниците кои резервирале лет во тие денови биле замолени да контактираат со нивната авиокомпанија или тур-оператор.
Германските синдикати во четврток најавија штрајк на националниот транспорт за понеделник поради спорот околу платите и работните услови. Вработените во јавниот транспорт, обезбедувањето и персоналот на аеродромите на главните аеродроми ќе престанат да работат 24 часа.
Аеродромот во Франкфурт соопшти дека штрајкот се очекува да предизвика големи нарушувања во понеделник и ги советува патниците да избегнуваат патување тој ден.
Најавено е дека штрајкот ќе влијае и на луѓето кои се поврзуваат со други летови на аеродромот во Франкфурт.
Синдикатот Ver.di овој месец започна серија штрајкови откако вториот круг на колективни договарања со владата и локалните власти заврши без договор.
Синдикатот, кој претставува околу 2,5 милиони работници во јавниот сектор, бара зголемување на платите за 10,5 отсто и не помалку од 500 евра поради високата инфлација и зголемените животни трошоци.
Се очекува следната недела да започне нова рунда преговори.
