Израелските војници употребија шок-бомби и сила за да ги спречат демонстрациите на солидарност на стотици израелски левичарски активисти со палестинската населба каде еврејските доселеници го запалија палестинскиот имот и насилно протестираа претходно оваа недела.
Левичарските активисти рекоа дека двајца демонстранти биле соборени и задушени од војници и накратко приведени.
Автобуси со активисти за човекови права беа запрени од војниците и граничната полиција и беа спречени да влезат во градот Хувара на окупираниот Западен Брег, со 5.500 жители, каде се уште се гледаат последиците од нападот на еврејските доселеници.
Стотици еврејски бунтовници, некои со ножеви и пиштоли, дивееја во Хувара во неделата и запалија десетици куќи, продавници и возила како одмазда за убиството на двајца Израелци во палестински вооружен напад. За време на немирите загина еден Палестинец.
Израелската армија објави дека е изненадена од жестокоста и обемот на насилството од страна на еврејските доселеници. Израелското Министерство за одбрана ги испрати двајцата осомничени водачи во административен притвор.
Денеска, палестинските возачи свиреа во знак на поддршка на демонстрантите кои извикуваа „Не на окупацијата!“ и „Крај на еврејскиот терор!“.
Хувара, која долго време е сцена на конфликт меѓу два народа, утрово ја посетија европски дипломати.
Насилството на еврејските доселеници беше осудено во странство, особено изјавата на министерот за финансии на Израел и лидерот на еврејските доселеници Бекаел Смотрич дека Хувара „треба да биде уништена“. Смотрич, чија ултрадесничарска партија Религиозен ционизам сака Израел да анектира големи делови од Западниот Брег, подоцна ја повлече таа изјава.
Министерството за надворешни работи на Египет денеска ги нарече зборовите на Смотиќ „опасно и неприфатливо поттикнување насилство“.
