Франција се опоравува од четвртата ноќ на немири предизвикани од полициското убиство на тинејџер во саботата, додека неговото семејство се подготвува за погреб што ќе се одржи денеска.
Владата распореди 45.000 полицајци и неколку оклопни возила низ целата земја за да ја спречи најтешката криза во мандатот на претседателот Емануел Макрон од протестното движење „Жолти елеци“.
Во четвртата ноќ од немирите опожарени се повеќе од 1.300 автомобили, а на патиштата подметнати 2.560 пожари, соопшти француското МВР.
Според властите, нападната е 31 полициска станица.
Вкупно 1.311 лица се уапсени ноќта од петокот кон саботата, соопшти МВР, а просечната возраст на уапсените е 17 години.
Оваа бројка е значително зголемување во однос на апсењата претходната ноќ, кога беа 875, соопшти Министерството.
Но насилството беше „помалку интензивно“ од порано.
Досега се повредени над 200 полицајци.
Нахел М, 17-годишник со алжирско и мароканско потекло, беше убиен за време на сообраќајна контрола во вторникот во предградието на Нантер.
Тој ќе биде погребан подоцна во сабота. Патиштата што водат до погребалното претпријатие и гробиштата ќе бидат затворени, дознава Ројтерс.
Смртта на Нахел ги разгоре долготрајните поплаки од сиромашните и расно мешаните урбани заедници за полициското насилство и расизмот. Макрон го негираше постоењето на системски расизам во француските агенции за спроведување на законот.
