Повеќе од 90 отсто од загинатите во земјотресот во Авганистан минатата сабота се деца и жени, објавија Обединетите нации.
Талибанските власти соопштија дека бројот на загинати во земјотреси со јачина до 6,3 степени во западен Авганистан, во близина на градот Херат, се искачи на повеќе од 2.000 и дека се од различна возраст и од двата пола.
Според податоците на ОН, епицентарот на земјотресот бил во областа Зенда Јан, каде загинале 1.294 лица, 1.688 се повредени, а сите куќи биле урнати.
Шефот на теренската канцеларија на УНИЦЕФ во Херат, Сидиг Ибрахим изјави дека е поверојатно дека жените и децата биле дома наутро кога се случил првиот земјотрес, а потоа имало уште неколку силни.
„Кога се случи првиот земјотрес, луѓето мислеа дека е експлозија и влегоа во нивните домови“, рече тој.
Уште стотици, главно жени, се уште се водат за исчезнати во Зенда Јан.Претставникот на Фондот за население на Обединетите нации во Авганистан Хаиме Надал изјави дека нема да има „родова димензија“ во бројот на загинатите доколку земјотресот се случел ноќе.
„И наутро мажите излегоа бидејќи многумина одат во Иран на работа. Жените потоа се занимаваа со домашни работи и се грижеа за деца и беа заробени под урнатините. Јасно е дека имаше родова димензија“, изјави Надал за Асошиетед прес.
Првиот и последователните земјотреси срамнија со земја цели села. Стотици куќи направени од тули и кал беа целосно уништени – останаа само купишта сува земја. Уништени се и училишта, здравствени клиники и други рурални објекти.
Надал рече дека родилиштето во провинцијата Херат е распукано и небезбедно, а Фондот за население на ОН доставил шатори за родилките да имаат каде да престојуваат и да се грижат.
Многу луѓе сè уште спијат надвор, дури и кога температурите се ниски.
Поради големиот број убиени жени, многу деца останаа без своите мајки, нивните основни старатели, па се поставува прашањето кој ќе ги воспитува или како да им ги дадат на нивните татковци кои можеби се надвор од провинцијата или Авганистан, пишува АП. .
Во таа област нема или има многу малку сиропиталишта, што значи дека децата кои изгубиле еден или двајцата родители веројатно ќе живеат со преживеаните роднини.
Земјотресите се чести во Авганистан поради честите движења на три тектонски плочи.
Поради строгите мерки што талибанците им ги наметнаа на жените кога се вратија на власт, тие не можат ниту да добијат навремени информации и предупредувања за земјотреси.
УНИЦЕФ упати апел да се соберат 20 милиони долари помош за околу 13.000 деца и семејства погодени од земјотресот.
