Додека во Цетиње трае распитот на Ненад Калоѓеровиќ, човекот кој го спречил понатамошниот масакр со тоа што пукал, а уште не се знае дали го усмртил напаѓачот, Вук Бориловиќ, црногорската полицијата е на голема критика и удар од народот и јавноста. Очевидците зборуваат дека лошото обезбедување на полицијата дозволило жена со торби која поминувала да стане мета на напаѓачот и така да се вброи меѓу 10-те жртви, пишува Индекс.
„Кога полицијата веќе била на критична локација и наводно го обезбедувала местото, како што инсистира началникот на полицијата во Цетиње Далибор Шабан, еден од очевидците видел жена, со торби во рацете, како непречено оди кон нејзината куќа во Медовина.
– Полицајците не ја спречиле, не ѝ го ограничиле понатамошното движење ниту ја предупредиле и на тој начин таа влегла во зоната на дејство на оружјето на Бориловиќ. Тој пукал во нејзина насока и ја убил – изјави Побједа за Побједа сведочењето на очевидецот Александар Саша Зековиќ од Цетиње, инаку координатор на Граѓанската иницијатива „21. мај“.
Тој додава и дека има повеќе примери за несоодветно обезбедување на критична локација и за тоа, како што најави, ќе зборуваат граѓани-очевидци.
– Полициската управа интензивно се обидува да ги демантира речиси сите наводи за неуспесите во Цетиње, притоа не дава никаков доказ за своите тврдења. Филип Аџиќ и Зоран Брѓанин досега не реагирале на несоборливите тврдења на граѓанин кој бил сведок на настанот, кој дури четири пати повикал полиција за да укаже што се случува на критичната локација – додаде Зековиќ.
Тој го повика министерот за внатрешни работи „внимателно да ги слуша повиците од матичниот телефон на Полициската дежурна служба и комуникацијата од радиоврската“.
Сведок на трагедијата во Цетиње вчера стапил во контакт со Антена М и им врачил отпечаток од телефонски повици со кои се потврдува дека тој ја известил полицијата за пукањето во петокот во 15 часот и 22 минути. За разлика од ова, полицијата тврди дека првиот повик дошол осум минути подоцна, во 15 часот и 30 минути, а дека полицајците на местото стигнале за три минути.
Меѓу останатите проблеми во случајот се и стравувањата дека може да има крвна одмазда кон семејството на напаѓачот Бориловиќ кој уби 10 луѓе и рани шестмина. Според началникот на криминалистичката полициска станица во Подгорица, Срѓан Кориќ, таква опасност нема.
Кориќ ја извести јавноста дека во моментов се чека балистички извештај и дека ќе бидат направени повеќе вештачења.
