Со 168 гласа „за“ Македонија денеска стана нова членка на Советот за човекови права на Обединетите Нации за периодот 2025-2027, на изборот што се одржаа во Генералното собрание на ОН во Њујорк, соопшти Министерството за надворешни работи и надворешна трговија.
Шефот на дипломатијата Тимчо Муцунски на социјалните мрежи објави дека поддршката од земјите членки на ОН за овој избор е признание за придонесот на нашата држава како посветен промотор и заштитник на човековите права и слободи.
Муцунски нагласи дека една од главните цели по овој дипломатски успех ќе биде активното учество во Советот, со придонес за глобална промоција на човековите права и подобрување на ситуацијата ширум светот, што е основа и на нашата кандидатура за членство.
Во најновиот Национален извештај за универзалниот периодичен преглед презентиран пред Советот за човекови права во Женева, Македонија е високо на листата држави кои ги почитуваат и гарантираат човековите права и оценета како квалификуван кандидат кој ги исполни неопходните услови за да биде дел од работата на ова меѓународно тело.
Македонија по вторпат е избрана за членка на Советот за човекови права на ОН, откако претходно членуваше во периодот 2014-2016.
Albanian
English
Macedonian
Turkish
