На денешната заедничка пресконференција при посетата на украинскиот претседател Зеленски на Софија, тој жестоко му одговори на својот бугарски колега Румен Радев, кога тој му рече дека Софија одбива да и даде муниција на земјата која е во војна.
– Не дај боже да ви дојде војна, па да нема кој да ви помогне. Господинот претседател рече дека не поддржува да ни се даде муниција за да не ослабне вашата армија или да не го поддржувате зајакнувањето на Украина. Вашата армија, што и да имате, нема да биде доволна да се борите ако Русија дојде овде… – му одговори Зеленски на Радев.
Денеска во Софија беше потпишана декларација за воена поддршка од Бугарија за Украина, но, Радев вели дека нема да се користат резервите на бугарската армија:
– Оваа декларација е важен чекор во развојот на нашите односи, но јас не прифаќам предавање муниција, особено од резервите на бугарската армија. Јас како претседател, како и вие, имам заложба дека одбранбените капацитети на Бугарија не треба да се намалуваат бидејќи безбедносното опкружување е алармантно и во нашиот регион, за сите нас е уште посериозно што конфликтот се шири и добива нови димензии – истакна и Радев и додаде дека непријателствата стануваат сè пожестоки, а сè повеќе луѓе умираат, вклучително и Бугари од заедницата во Украина.
Украинскиот претседател реагираше и на тоа што Радев за војната во Украина го искористи зборот конфликт.
– Ова не е конфликт, туку војна, војна за уништување на Украина, да се убиваат Украинци, а не други земји и фала му на бога – рече Зеленски.
