Кандидатот за потпретседател во кампањата на Доналд Трамп, Џејмс Венс, е „премногу радикален“ во неговите идеи како да се стави крај на војната во Украина, изјави украинскиот претседател, Володимир Зеленски, на интервју за порталот Њујоркер во неделата.
Венс, кој ги критикуваше пакетите со помош на САД за Украина и се залагаше за преговори со Русија, на почетокот на овој месец посочи дека планот на Трамп за ставање крај на војната може да вклучи воспоставување специјална демилитаризирана зона меѓу Украина и Русија.
Тој рече дека Украина ќе го задржи својот суверенитет, но ќе мора да ѝ даде гаранции на Москва дека нема да се приклучи на НАТО или на која било друга сојузничка институција.
– Идејата дека светот треба да стави крај на оваа војна на сметка на Украина е неприфатлива. Но, овој негов концепт не го сметам за план во каква било формална смисла – рече украинскиот претседател.
Тој додаде дека не го сфаќа Венс сериозно.
– Не ги сфаќам сериозно зборовите на Венс бидејќи ако ова беше план, Америка оди кон глобален конфликт. Во него ќе се вклучат Израел, Либан, Иран, Тајван, Кина, како и многу африкански земји. Тој пристап ќе му го пренесе на светот имплицитното правило „дојдов, победив, сега ова е мое“ – додаде тој.
По целосната руска инвазија на Украина во февруари 2022 година, Зеленски побара неговата земја да биде примена во НАТО што е можно поскоро.
Јенс Столтенберг, генералниот секретар на НАТО во заминување, рече дека членството на Украина во НАТО не е „прашање на дали, туку на кога“, иако рече дека Украина нема да стане членка за време на војната со Русија.
Зеленски рече дека Доналд Трамп не знае како да ја запре војната дури и ако мисли дека знае.
