Украинскиот претседател Володимир Зеленски во текот на викендот им соопштил на медиумите во Киев дека „постои сериозна закана, Русија е технички подготвена да предизвика локална експлозија во електраната (Запорожје), што може да доведе до испуштање на опасни материи во воздухот“.
– Ние разговараме за сето ова со нашите партнери за сите да разберат зошто Русија го прави ова и затоа се врши политички притисок врз Руската Федерација да не размислува за тоа – додаде тој.
Зеленски во разговор со францускиот претседател Емануел Макрон изразил загриженост поради намерата на Русија да изврши „опасни провокации“ во нуклеарната централа Запорожје, која моментално е под контрола на Москва.
Централата, најголемата во Европа, е предмет на постојани безбедносни грижи поради руската инвазија на Украина, која трае повеќе од една година.
Зеленски ја истакна потребата да се одржи максимална контрола врз ситуацијата и да се вклучи Меѓународната агенција за атомска енергија (МААЕ) во решавањето на потенцијалните ризици.
