Украинскиот претседател Володимир Зеленски го разреши заменик-шефот на Службата за безбедност на Украина (СБУ) Олександар Јакушев, двајца раководители на сектори и раководители на СБУ во два украински региони, објавија медиумите.
Разрешени се шефот на Одделот за економска поддршка Олександар Провоторов, раководителот на Одделот за заштита на државни тајни Игор Ношко, како и раководителите на службата во регионите Запорожје и Суми, Борис Безруки и Едуард Федоров.
Зеленски веќе назначи нови луѓе на две од петте испразнети позиции, пишува Киев Индипендент.
Ова не се први промени во украинската тајна служба од почетокот на руската инвазија, бидејќи во јули минатата година беше сменет шефот на СБУ Иван Баканов.
Украинскиот парламент на 7 февруари го назначи Василиј Маљук за нов шеф.
