Победата на Украина во војната со Русија зависи од соработката со Европската унија, изјави претседателот Володимир Зеленски пред министрите за надворешни работи на ЕУ собрани во Киев во понеделникот.
Зеленски, исто така, ја нагласи важноста на „одбранбената поддршка“ за Украина откако американскиот Конгрес ја остави воената помош на Украина надвор од буџетот за трошење, а изборите во Словачка ги победи партија чиј лидер рече дека ќе стави крај на воените испораки на Украина од нејзините воени складишта.
Украина се надева дека ќе исполни голем број критериуми на ЕУ за да се приклучи на блокот и во голема мера се потпира на западната воена помош од руската инвазија која започна во февруари 2022 година.
„Сигурен сум дека Украина и целиот слободен свет се способни да победат во овој конфликт. Но, нашата победа директно зависи од нашата соработка со вас“, рече Зеленски во изјавата до министрите.
„За нас е многу важно сите да направиме чекори напред во секоја област, без да запираме на ништо, со активноста на Европа, со раководството на Европа“, додаде тој во изјавата објавена на претседателската веб-страница.
Постојано се потребни нови чекори во одбраната и дипломатијата, политиката и интеграцијата, економијата и санкциите, чекори кои ќе ги зајакнат нашите заеднички позиции, посочи украинскиот претседател.
Тие чекори, рече тој, вклучуваат „активност за одбранбена поддршка за Украина и заштита на животот“.
„Исто така, многу е важно максимално да се зајакне украинскиот небесен штит пред зимата. Системите за противвоздушна одбрана што ги доби нашата земја, како Patriot, IRIS-T, NASAMS и други, веќе играат позитивна улога и спасуваат животи“, рече тој.
„Потребни ни се повеќе вакви системи – особено неколку патриоти за заштита на нашите јужни региони може суштински да ја променат ситуацијата и да го направат рускиот терор бесмислен во голема мера“, рече Зеленски.
