Здравствените работници имаат десетпати поголем ризик од заболување од грип во споредба со општата популација, поради природата на својата работа. Тие можат да се заразат со грип од своите пациенти или колеги. Според студии, за време на епидемија во здравствените установи, повеќе од половината здравствени работници кои се грижат за пациенти со грип, исто така се инфицираат од вирусот, истакнаа утрово од Институтот за јавно здравје (ИЈЗ).
„Грипот е сериозна болест и може да предизвика пневмонија, бронхитис или да ги влоши хроничните здравствени состојби. Вакцинацијата против грип, секоја година, е најдобар начин да се заштитите од ова заболување“, велат од Институтот.
Според студиите, здравствените работници можат да го пренесат грипот на своите пациенти, особено на оние кои се подложни на развој на компликации.
„Грипот е особено опасен за мали деца, постари лица и луѓе со ослабен имунитет или други хронични заболувања. Како резултат на пренос на грип од здравствен работник, некои пациенти може да развијат компликации опасни по животот. Документирани се случаи на смрт од грип во неонатални центри за интензивна нега и на онколошки педијатриски одделенија“, се додава во соопштението.
