Украинскиот амбасадор во Велика Британија и поранешен врховен командант на вооружените сили на Украина, Валериј Залужни, смета дека директното учество на автократските сојузници на Русија во војната против Украина укажува дека Третата светска војна веќе започнала.
– Верувам дека во 2024 година можеме со сигурност да кажеме дека Третата светска војна започна. Причината за тоа е што во 2024 година Украина повеќе не се соочува само со Русија. Украина се соочува со војници од Северна Кореја. Да бидеме искрени, иранските беспилотни летала од типот Шахед отворено убиваат цивили во Украина – рече Залужни.
Ракетите, произведени во Северна Кореја, потенцира тој, се лансираат кон Украина, а тие не го кријат тоа.
– Гранати од кинеско производство експлодираат низ цела Украина, а делови од Кина се инсталираат во руски ракети – додаде Заслужни.
Украинскиот амбасадор нагласи дека мнозинството воени офицери се согласува дека сите овие фактори укажуваат на тоа дека светската војна веќе започнала и дека светот мора да биде подготвен за тоа, објави Украинска правда.
– Тоа, што долго го очекувавме, сега се случува. Но, сакам да кажам дека Господ дава можност, не само на Украина, туку и на целиот свет, навреме да дојде до вистинските заклучоци. Сѐ уште има шанса да се запре ова овде, на територијата на Украина. За жал, нашите партнери одбиваат да го разберат ова поради некоја причина. Јасно е дека Украина веќе има премногу непријатели. Украина ќе преживее благодарение на технологијата, но останува прашањето дали може сама да ја добие оваа битка. Поради сето ова сметам дека светската војна веќе започна – заклучи Залужни.
