Вчера, по спроведена акција на Единицата за недозволена трговија и Единицата за интервентна полиција при СВР Скопје, две лица беа уапсени на Бит Пазар, а при претресот беа пронајдени над 40.000 парчиња пиротехника, голема количина тутун и цигари без бандероли.
Според информациите од Министерството за внатрешни работи, првото лице, Б.И. (47) од село Студеничани, поседувало 11.604 пиротехнички средства, околу 40 килограми тутун, голема количина цигари без бандероли и парични средства. Второто лице, С.Н. (48) од Скопје, било затекнато со 14.942 парчиња пиротехника и парични средства.
„Двете лица се приведени и против нив ќе биде поднесена кривична пријава по член 396, став 7 од Кривичниот законик“, изјавија од МВР, додавајќи дека дополнително биле пронајдени околу 14.000 парчиња пиротехнички средства на импровизирана тезга.
Полицијата апелира до граѓаните да не купуваат и користат пиротехнички средства, бидејќи тие претставуваат опасност за јавната безбедност и можат да доведат до повреди.
Акциите за контрола на недозволената трговија ќе продолжат и во наредниот период.
