Замрзната е цената на векна бел и полубел леб на 33 денари парче, со тежина од 450 грама и повеќе. За леб со помала тежина цената се ограничува со цена којашто ќе биде во сооднос со тежината лебот.
Ова се одлуките на денешната седница на Владата, што ги соопшти премиерот Димитар Ковачевски, на прес-конференцијата со министерот за економија Крешник Бектеши.
– Антикризните мерки не ги донесовме за едни да плаќаат, а други да се богат. Мерките не беа донесени да удрат по џебот на граѓаните, на штета на граѓаните, а во корист на поединци. Субвенциите беа донесени со цел да се намалат цените на основните производи. Крајна цел беше помош на граѓаните – изјави Ковачевски.
Премиерот рече дека во декември е овозможено компаниите да добиваат повластена цена на енергијата и таа да биде пониска, односно 80 евра по мегават час, кога цените на берзите беа и над 400 евра за мегават час, при што владата имала цел со тоа да ги намали цените на основните прехранбени производи.
– Јас нема да дозволам неоправдано зголемување на цените, затоа што помина доволен период од донесувањето на антикризните мерки за цените да се усогласат, бидејќи помошта од владата беше навремена и реална. По извршените проверки од Државниот пазарен инспекторат, иако производителите на прехранбени производи добиваа субвенционирана електрична енергија, тие цените на своите производи не ги намалија, или ги намалија незначително. Дел од производителите ги намалија цените од 7 до 12 проценти – објасни Ковачевски на денешната прес-конференција.
Одлуката стапува на сила утре, со објавата во „Службен весник“. На денешната седница било одлучено да се укине повластената цена на електрична енергија за компаниите кои произведуваат основни прехранбени производи, а цената на лебот останува замрзната до 31 мај годинава.
Во иднина, производителите на основните прехранбени производи ќе се снабдуваат со енергија согласно Законот за енергетика и со правилата за снабдување со електрична енергија, рече Ковачевски.
