Српскиот претседател, Александар Вучиќ денеска, на Самитот на Европската политичка заедница во Будимпешта, изјави дека Европската Унија треба да ја промени стратегијата во однос на целиот Западен Балкан, како и во однос на Србија, и да донесе стратешки одлуки за прашањата за проширувањето.
– Мислам дека треба да разговараме за стратешки прашања – нагласи Вучиќ.
Тој напомена дека влезот на Романија, Бугарија и на некои други земји во ЕУ бил политичка одлука.
– Тоа беше политичка одлука, донесена од ЕУ, во време кога имаше стратешки одлуки и луѓе кои размислуваа стратешки. Така ние го гледаме. На некоја држава ѝ оди подобро. „Да, но Србија не ни треба. Бидејќи не воведоа санкции кон Русија или, поради која било друга причина, не решија дел од нивните проблеми“ – рече Вучиќ.
Тој додаде дека Србија не е единствената со проблеми и дека не ги создала сите свои проблеми сама.
Тој рече дека Србија останува на европскиот пат и е лојален партнер на ЕУ, како и дека на Европа ѝ треба стратешки разговор во новите околности.
