Возило излета од регионалниот пат Делчево – Пехчево – Берово кај делчевското село Стар Истевник. Екипа на делчевската полиција врши увид на местото на несреќата, каде сообраќајот се одвива по едниот дел од коловозната лента. Според информациите од полицијата, нема повредени лица во несреќата.Очевидци за МИА велат дека ова е критична делница каде за краток период се имаат случено неколку сообраќајни незгоди, заради што апелираа на интервенција на острата кривина кај село Стар Истевник каде се имаат случено сообраќајните несреќи.
Поради периодичните врнежи од дожд, сообраќајот на оваа делница на периоди се одвива по влажни коловози, заради што надлежните апелираа на внимателно возење и почитување на сообраќајната сигнализација.
Ова е втора сообраќајка за неколку дена на оваа делница, претходно на регионалниот пат Делчево – Пехчево – Берово возило излета од патот кај делчевското село Стамер.
