Најголема бруто месечна плата која е исплатена во 2021 година е во висина од 122,3 милиони денари (166.000 евра) и е во трговијата со тутун, информира денеска директорката на Управата за јавни приходи Сања Лукаревска.
Таа рече дека во 2021 година највисокиот годишен бруто доход изнесува 244,3 милиони денари (3,965 милиони евра).
Речиси 50.000 граѓани имале бруто доход од повеќе од 1 милион денари, додека најголемиот дел, вкупно 623.690 лица остварил бруто доход од 100.000 до 1 милион денари.
-Во однос на 2020 година, во 2021 година зголемен е бројот на граѓани, односно 25 граѓани оствариле приход над 100.000.000 денари, а 757 граѓани од 10 до 100 милиони денари – рече Лукаревска.
Граѓанин во 2021 година од Скопје ја остварил најголемата капителна добивка во износ 130,1 милион денари, од продажба на сопственички удел. Највисоката дивидента ја добил граѓанин од Велес во висина од 203 милиони денари од исплатувач чија дејност е трговија на мало со храна и пијалоци.
На врвот на листата на исплата од доход од самостојни дејности се скопјани, а највисокиот износ е 102,4 милиони денари.
На листата од 10 со највисоки приходи се адвокати, нотари, угостители, вработени од трговија на мало, лица од дејноста малтерисување.
-Жител на Ресен остварил највисок доход од продажба на земјоделски производи, 17,6 милиони денари, а скопјанец имал највисок доход од 37 милиони денари од издавање на деловен и стабен простор. По основ на игри на среќа на жител од Скопје му се исплатени 41,1 милион денари од Државна лотарија, а второрангираниот по овој основ остварил добивка од обложувалници 31,3 милиони денари. Пензионер од Скопје пријавил странска пензија од 5,8 милиони денари годишно – рече Лукаревска.
Најмладиот милионер е на возраст од 8 години. Тој добива семејна пензија, а пензионер од 96 години остварил доход од 1,2 милиони денари.
Во категоријата друг доход се вклучени доходи од различни извори кои не се вклучени во Законот за личен доход како што се доход со електронска трговија на интернет и доход од продажба на отпад.
-Тетовец по овој основ пријавил 171,3 милиони денари годишен бруто доход, а тетовка е второрангирана со 155,1 милион денари исплатени од компании кои работат со социјални мрежи и видео платформи – инфорира Лукаревска.
