14-годишно девојче е убиено, а 13-годишно девојче е повредено во понеделникот во напад со нож во градот Илеркирхберг во близина на градот Улм на југот на Германија. Наводниот осомничен, 27-годишен Еритреец кој живее во засолниште за бегалци таму, наводно ги нападнал девојчињата на пат кон училиште. Покрај него, полицијата приведе уште двајца мажи, јавува британски Би-Би-Си.
Полицијата кај осомничениот пронашла нож за кој се сомневаат дека го користел во нападот. Наводниот сторител моментално е под полициски надзор во болница, каде што му е укажана лекарска помош поради непознати повреди. Во соопштението, полицијата ја повика јавноста да не го користи инцидентот за поттикнување сомнеж или омраза кон странците и барателите на азил.12
„Се што е поврзано со овој (настан) засега е целосно нејасно“, изјави за новинарите портпаролот на полицијата Волфганг Јургенс. Според локалните медиуми, 13-годишното девојче кое беше повредено во нападот се опоравува од повредите. Овие не се опасни по живот.
Реагирајќи на нападот, германската министерка за внатрешни работи Ненси Фезер рече дека е шокирана од страшната вест. „Жалам за убиеното девојче и искрено се надевам дека повреденото девојче ќе закрепне… Полицијата интензивно ја истражува позадината на нападот“, напиша таа на Твитер.
Илеркирхберг е село во јужна Германија со население од помалку од 5.000 жители според пописот од 2015 година. Според градоначалникот Маркус Хауслер, жителите се во шок поради инцидентот, јавува и Би-Би-Си.
