Турција во март ќе започне со изградба на 30.000 станбени згради во зоната на земјотресите и постепено ќе започне со изградба на нови куќи подалеку од раседните линии.
Ердоган рече дека активностите за тоа ќе започнат веднаш штом ќе завршат операциите за пребарување и спасување и ќе се расчистат остатоците.
– Турција ќе продолжи со напорите за потрага и спасување додека последниот преживеан не биде извлечен од урнатите згради – рече тој.
Поздравувајќи ја Управата за домување на Турција (AFAD) за изградба на домови отпорни на земјотреси, тој рече дека државната агенција ќе ги изгради домовите во рамките на едногодишен план.
Тој истакна дека бројот на загинати достигна 35.418.
Повеќе од 105.500 луѓе се спасени од урнатините по земјотресите, а 13.208 повредени во катастрофата сѐ уште се лекуваат во болница.
Претседателот истакна дека 28.000 турски војници и 250.000 јавен персонал се на должност во зоната на земјотресот, кои вршат активности за пребарување и спасување.
Повеќе од 175.000 шатори и 5.400 контејнери се поставени во земјотресните зони за привремено преселување на преживеаните од земјотресот чии домови беа уништени во катастрофата.
Турските власти денеска соопштија дека вкупно 50.576 згради биле урнати или сериозно оштетени по двата разорни земјотреса минатата недела, јави ДПА.
Во извештајот на турското Министерство за урбанизам се наведува дека сите тие опасни градби мора итно да се отстранат.
Досега, властите проверија над 387.000 згради во десетте погодени окрузи во југоисточна Турција. Најмногу објекти што треба итно да се урнат има во градот Газиантеп – речиси 12 илјади. Следува Хатај со 10.911 и Кахраманмараш со 10.777.
Двата разорни земјотреса на 6 февруари беа проследени со 3.858 последователни потреси со интензитет поголем од 5 степени според Рихтеровата скала, соопшти турската цивилна одбрана.
