Осумчлено семејство е убиено во израелски напад врз централниот дел на Појасот Газа, соопштија палестинските медицински претставници.
Израелските сили се борат против палестинските милитанти и бараат евакуација на стотици илјади луѓе од северниот дел на Газа.
Израел води воздушна и копнена кампања против Хезболах во Либан и се очекува да го нападне Иран како одмазда за неговиот ракетен напад врз Израел на почетокот на овој месец, иако не објави за каков напад би бил и кога ќе биде извршен.
Во израелскиот напад во Газа доцна синоќа, беше погодена куќа во бегалскиот камп Нусејрат, при што загинаа родителите и нивните шест деца, на возраст од осум до 23 години, според болницата за маченици Ал Акса, во соседниот Деир ал Балах, каде што нивните тела беа земени.
Како што се наведува, ранети се и седум лица, меѓу кои две жени и едно дете кое е во критична состојба.
Репортерот на АП ги броел телата и ги снимил погребните молитви за починатите во болницата.
Повеќе од една година од војната со Хамас, Израел продолжува да напаѓа речиси секојдневно врз, како што вели, милитантните цели во Газа. Израелската армија соопшти дека избегнува да повредува цивили и ги обвинува Хамас и другите вооружени групи за нивната смрт, бидејќи тие „оперираат во густо населени области“. Израелската армија ретко коментира поединечни напади во кои често се убиени жени и деца, пишува АП. Во последниве месеци, армијата постојано ги гаѓаше училиштата што раселените ги користат како засолништа, обвинувајќи ги милитантите дека се кријат меѓу цивилите.
Во северниот дел на Газа, израелските воздушни и копнени сили ја напаѓаат Дабалија, каде милитантите се прегрупираат кон армијата. Во текот на изминатата година, израелските сили постојано се враќаа во тој бегалски камп и во другите области кои беа нападнати.
Израел нареди целосна евакуација на северниот дел на Газа, вклучувајќи го и самиот град Газа. Според проценките, околу 400.000 луѓе останале на северот по масовната евакуација наредена во првите недели од војната. Војната започна на 7 октомври 2023 година, откако палестинскиот Хамас ги нападна израелските територии. ;
Палестинците стравуваат дека Израел има намера трајно да го премести северот и таму да воспостави воени бази или еврејски населби.
Војската потврди во саботата дека болниците се вклучени во наредбите за евакуација, но не постави конкретен рок.
Армијата соопшти дека медицинскиот конвој кој претходните денови требало да ги префрли пациентите од болницата „Камал Адван“ бил откажан поради безбедносни причини, но дека горивото во болницата било доставено во саботата.
