Матичната компанија на Инстаграм – Мета објави дека неколку десетици милиони луѓе продолжуваат да ја користат популарната социјална мрежа во Иран и покрај драстичните ограничувања на интернет воведени од локалните власти поради протестното движење кое започна во септември.
„И покрај обидите (од страна на властите) да го блокираат Инстаграм, неколку десетици милиони луѓе продолжуваат да наоѓаат начини за пристап до него преку VPN (виртуелна приватна мрежа) и други методи“, изјави претставникот на Мета Ник Клег за новинарите.
Според него, Иранците користат Instagram Lite, полесна верзија на апликацијата (два наместо 30 мегабајти), која овозможува постабилна врска дури и кога пропусниот опсег е намален.
Иран го ограничи пристапот до интернет и социјалните медиуми – вклучувајќи ги Инстаграм и WhatsApp, најпопуларните странски платформи во земјата, од почетокот на протестите.
Бран протести избувна во средината на септември по смртта во притвор на младата курдска девојка Махса Амини, која беше уапсена во Техеран од полицијата за морал поради кршење на строгиот кодекс на облекување.
Instagram Lite, лансиран во 2021 година за луѓе во оддалечените рурални области, е достапен во Иран од минатата година.
