Попладнево во близина на село Марвинци се случила тешка сообраќајна незгода во која биле повредени 29 мигранти. Според неофицијалните информации до кои дојде Плусинфо, кон местото на несреќата се упатени повеќе возила на Итната медицинска помош за да интервенираат кај повредените лица. Мигрантите наводно биле сместени во камион, имало педесетина лица, според податоците од Брзата помош во Кавадарци која добила итен повик.
Како што дознаваме меѓу повредените има и деца, но нивната точна бројка не ја знаеме со сигурност.
„На 10.08.2022 во 18:10 пријавено е дека товарно возило излетало од патот на клучка од с.Марвинци кон М1, рег.пат Гевгелија – Д.Капија. Утврдено е дека се работи за товарно возило Сканија со приколка со скопски таблици. Возачот се дал во бегство, а на лице место се пронајдени мигранти. Се преземаат мерки за расчистување на случајот“, велат од МВР.
Медицинските лица им укажуваат прва помош на местото на несреќата по што ги препраќаат во болниците во Гевгелија, во Валандово, во Кавадарци, во Струмица, во Штип, во Велес и во Куманово, а потешко повредените треба да бидат пратени на Клиника во Скопје.
