Повеќе земји започнаа евакуација на своите граѓани од Судан, откако во оваа земја се разгоре воен конфликт. Првиот германски воен авион со луѓе евакуирани од Судан, слета во Берлин. Во авионот имаше 101 германски државјанин и членови на нивните семејства, како и државјани на земјите партнери, соопшти германското МНР.
Вкупно три Ербас А400М на Бундесверот полетаа за Судан за да ги земат луѓето што треба да бидат евакуирани.
Германија се обидува да евакуира повеќе од 300 германски државјани, регистрирани на кризната листа заедно со државјани на земјите-партнери, доколку е можно. Во мисијата се вклучени повеќе од 1.000 членови на Бундесверот.
Во две групи, првата со помош на Франција, втората со помош на Италија, успешно беа евакуирани грчки државјани од Судан, а операцијата за евакуација на останатите Грци продолжува, соопшти грчкото МНР. Сите грчки државјани со помош на француски и италијански авиони, веќе се пренесени во Џибути, каде што се наоѓаат грчката амбасадорка во Етиопија и почесниот конзул во Џибути за да ги пречекаат Грците и да асистираат доколку им е потребна помош.
