Околу 30 училишта во Белгија се затворени поради закани за бомби. Според ученици, околу 10.000 основци и средношколци останале дома.
Околу 30 училишта во Брисел и белгиската провинција Валонски Брабант во која се зборува француски, останаа затворени утринава, откако во неделата вечерта добија дојава за бомба.
Според проценките на надлежните училишни органи, погодени се приближно 10.000 ученици. Во меѓувреме полицијата ги проверува сите погодени училишта.
Училишниот одбор во француското говорно подрачје на Белгија (WBE) денеска на својата веб-страница објави дека околу 30 училишта во неговата мрежа нема да ги отворат вратите за учениците утринава, откако претходно вечерта беа цел на закани за бомби испратени преку е-пошта.
„Вчера вечерта, неколку директори на училишта не известија дека добиле заканувачка електронска пошта“, објасни шефот на WBE, Жулиен Никез за белгиската телевизија RTBF.
Во е-поштата се споменува и употребата на „експлозиви доколку не платиме откуп“, додаде тој.
Според проценките на WBE, погодени се околу 10.000 ученици од основните и средните училишта во Брисел и во валонската провинција Брабант јужно од главниот град на Белгија.
Како што соопшти и WBE, полициски службеници денеска ќе ги посетат сите погодени училишта за да извршат увид. Неколку локации веќе се проверени од полицијата или се во процес на увид, напишаа на веб-страницата.
Воедно, WBE изрази жалење што во последните недели се зголемува бројот на ваквите закани за училиштата и истовремено укажа на проблемите што тие ги предизвикуваат за сите, особено за семејствата.
На почетокот на месецот, по враќањето од есенските празници, две училишта во градовите Шарлроа и Динан во Валонија мораа да бидат евакуирани поради закани за бомби. Бомбата не е откриена, пренесува француската новинска агенција АФП.
