Опозициската ВМРО-ДПМНЕ во свое соопштение ѝ предложи на Владата неколку мерки да се справи со инфлацијата и со енергетската и економската криза кои ѝ се закануваат на Македонија. Според нив, за дел од мерките Владата нема слух или ги одбила. Во продолжение, го пренесуваме соопштението во целост:
„Македонија се наоѓа среде огромна економска криза поради лошите, погрешните и ненавремени мерки на владата на Ковачевски.
Граѓаните според последните податоци на заводот за статистика се соочуваат со инфлација од 6,7 отсто. Ваквата инфлација ја јаде и надминува годишната стапка на раст на просечната плата, што значи дека стандардот на граѓаните не само што не расте, туку и опаѓа. Граѓаните се соочуваат со поскапени производи и трошоци на живот. Горивата за краток период пораснаа за околу 70 отсто, електричната енергија за 30 отсто, а основните намирници, масло, леб и млеко во просек се поскапени за 30-тина проценти. Со истите плати и пензии се купува се помалку и помалку производи.
Владата треба итно да преземе мерки за справување со ваквата состојба, особено ако се земе предвид актуелната геополитичка состојба која и тоа како ќе влијае врз енергенсите. Растот на цената на енергенсите влијае и на домаќинствата како и на стопанството. Владата треба да почне да размислува да ги укинува и да ги намалува даноците и таксите на сите оние производи кои граѓаните ги користат секојдневно а поради повисоките цени им го нарушуваат стандардот“.
Царината и данокот за увоз за на храна да бидат нула отсто
„Имено ВМРО-ДПМНЕ ќе бара преку Собранието на Република Македонија наместо 5 отсто повластена даночна стапка за промет и увоз на производи за човечка исхрана, да биде 0 отсто односно да не се плаќа данок, понатаму ќе бараме за топлинската енергија за греење наместо 5 отсто данок да нема данок. Овие барања да бидат со важност од денот на носење на законските измени заклучно со 31.12.2022 година“.
Намалување на акцизите за нафта на пола од цената
„Исто така ќе бараме продолжување на важноста на даночната стапка од 5 отсто за електрична енергија и после 1 јули, како и ќе бараме намалување на акцизата за нафта и нафтени деривати за 50 отсто. На овој начин кај нафтата и нафтените деривати покрај намалувањето на акцизата ќе дојде и до намалување на обврската за ДДВ поради намалената основица“.
Владата одби да бидат намалени царините за храна?
„Дополнително власта пред неколку дена одби да бидат намалени царинските тарифи за производите во прехранбената индустрија, предлог кој го дадоа пратениците на ВМРО-ДПМНЕ. Со ваквата мерка се очекува да се намали конечната цена на чинење на прехранбената производи, на кои во најголем дел се троши семејниот буџет. Владата треба да ја преиспита оваа одлука, и веќе ако се работи за суета нека ја предложи истата мерка, само и само да се заштеди некој денар од секој семеен буџет“.
Сами да произведуваме струја
„Во услови на енергетска криза, на која не ѝ се гледа крајот, власта треба да почне да работи на зголемување на домашното производство на струја, имајќи предвид дека лани ја завршивме со екстремно ниско ниво на производство кое го дополнувавме со скап увоз. Во оваа насока уште еднаш ја повикуваме владата да им излезе во пресрет на компаниите и општините кои ни криви ни должни беа ставени во ситуација да плаќаат од 300 до 800 отсто поскапа електрична енергија“.
Навреме да се снабдиме со залихи за кризата
„Владата на Ковачевски не треба да изигрува аналитичар за геостратешки политики, туку треба да биде практичар и веднаш да почне да дејствува пред да биде прекасно. Македонија не смее оваа криза да ја дочека неподготвена како што ги дочека енергетската криза и здравствената. Сите земји во регионот веќе се снабдуваат, прават залихи, стратегии и подготвуваат конкретни економски чекори како да го заштитат своето стопанство и стандардот на својот народ. Дел од државите веќе најавија дека нема да извезуваат производи кои се од животен интерес за нив, што значи дека ако не преземеме наскоро мерки, потоа ќе треба скапо, многу скапо да ги плаќаме“.
„Наместо гол маркетинг и гола политика го повикуваме Ковачевски да излезе од стакленото ѕвоно и да види каква е вистинската состојба. Монтираните видеа нема да му помогнат на граѓанинот исто како што и шминканите бројки и веселата математика на владата нема да му помогне да го преживее месецот“.
