Визната хармонизација на земјите од Западен Балкан со Европската унија влијаеше на намалување на бројот на илегални мигранти во ЕУ од овој регион, се наведува во извештајот на Европската комисија за состојбата во Шенген зоната, кој беше објавен денеска.
Мерките, кои беа спроведени во текот на минатата година, како што е усогласувањето на визните политики на Западен Балкан и ЕУ, „веќе дадоа добри први резултати со намален број на нерегуларни влезови во ЕУ од овој регион“.
Во извештајот се наведува дека нерегуларната миграција минатата година достигнала највисоко ниво од 2016 година, со 330.000 нелегални гранични премини пријавени од Европската агенција за гранична и крајбрежна стража (Фронтекс).
Таканаречената балканска рута учествуваше со 43 проценти од сите нередовни влезови во 2022 година, а зад неа, втора најфреквентна рута беше медитеранската рута.
Илегалните миграции, се додава, носат со себе ризици како што се експлоатација и опасност, што ги носат со себе илегалните морски и копнени патишта.
Благодарение на зголемените контроли на надворешните граници на ЕУ, во извештајот се оценува дека блокот е подобро подготвен од 2015 година за заеднички да го спречи нелегалниот прилив на мигранти.
„Во последниве месеци, беа направени напори за подобрување на граничните способности и поддршка за купување системи за електронски надзор на надворешната граница“, се вели во извештајот.
Заедничката визна политика на ЕУ е составен дел на Шенген и е една од најважните алатки за решавање на безбедносните ризици и предизвици што ги носи нерегуларната миграција во Шенген зоната, се додава.
„Редовниот мониторинг на безвизните режими што ги има ЕУ со трети земји, особено со земјите од соседството на ЕУ, покажа дека остануваат важни предизвици во овој поглед“, се додава.
