За прв пат заедничка јапонско-австралиска научна експедиција забележа специфичен вид риба на длабочина поголема од осум илјади метри, што е нов рекорд кога станува збор за риба на големи длабочини, бидејќи ја надмина старата за 158 метри. .
Тоа е всушност вид риби од родот Pseudoliparis и фамилијата Liparidae, снимен како плива на длабочина од 8.336 метри, изјави водачот на експедицијата, професорот Алан Џејмисон. Пред ова откритие, на 15 август минатата година, научниците забележале сличен вид на длабочина од 8178 метри во Маријанска Бразда.
Поставен уште еден рекорд
Долго време се сметаше дека рибите не можат да преживеат на длабочини од 8200 до 8400 метри поради притисокот. Џејмисон објасни дека, покрај снимките, научниците успеале и физички да фатат два примероци во стапица на длабочина од 8022 метри во Јапонскиот ров, јужно од Јапонија, и да постават уште еден рекорд – оној за улов во најдлабоките морските води до денес.
Двомесечната експедиција беше предводена од научници од Универзитетот во Западна Австралија (UWA) и експерти од Универзитетот за морски науки во Токио.
Велат дека се уште не се знае точно колкава е рибата, но досега е забележано дека овој вид може да достигне должина од околу 11 сантиметри.
„Длабокото море е прилично страшно“
На видеото до кое дојде камерата на далечина, може да се види дека рибата има млечно бела боја, перките се полупроѕирни, а телото изгледа како да е покриено со мека желатинозна маса, пишуваат јапонските медиуми.
„Јапонските ровови на океанот се неверојатни места за истражување, тие се толку богати со живот, дури и на самото дно“, рече Џејмисон, основач на Центарот за истражување на длабочините на море Minderoo-UWA.
„Веќе две или три години предупредуваме дека длабокото море е прилично страшно место. Но, не го цениме доволно фактот дека таа во основа го сочинува најголемиот дел од планетата Земја и дека треба да се обидеме да ја проучуваме и разбереме и да откриеме како функционира и како луѓето влијаат на тоа“, рече Џејмисон.
„Неверојатно искуство“
Водачот на јапонскиот тим на научници, д-р Китазато Хироши, изјави дека е неверојатно искуство да се открие риба на длабочина поголема од 8.000 метри под површината на океанот.
Тој додаде дека експертите сега имаат податоци кои ќе им помогнат да истражат како рибите можат физиолошки да се прилагодат на таква екстремна средина.
Научниците снимаат во океанските ровови во близина на Јапонија како дел од десетгодишното истражување на најдлабоките популации на риби во светот.
