САД извршија нови напади врз цели на Хутите во Јемен, еден ден откако првиот напад предизвика масовни протести во главниот град на Јемен.
„Нападот спроведен рано утринава беше насочен кон радарска локација на бунтовниците Хути во Јемен и беше дополнителна акција поврзана со нападите преземени на 12 јануари, осмислени да ја деградираат способноста на Хутите да напаѓаат бродови“ – објави американската војска во соопштението на Твитер.
– Дополнителните удари беа значително помали од претходната ноќ, кога беа погодени речиси 30 локации – изјави американски претставник за Си-Ен-Ен.
Официјалните медиуми на милитантите поддржани од Иран претходно објавија дека била нападната воздухопловната база Ал Даилами во главниот град на Јемен, Сана, под контрола на бунтовниците. Претходно вчера, директорот на Здружениот Генералштаб на САД, генерал-полковник Даглас Симс, изјави за новинарите дека Хутите лансирале противбродска балистичка ракета како одмазда за нападите во четвртокот вечерта, но таа не го погодила пловилото.
„Сите американско-британски интереси станаа легитимни цели за Хутите по нападот“ – објави Врховниот политички совет на бунтовниците, додека Хусеин ал-Ези, заменик-министер за надворешни работи на бунтовниците, рече дека САД и Велика Британија мора „да се подготват да платат висока цена“.
Пет лица загинаа, а шест беа повредени во офанзивата во четвртокот вечерта, за која Хутите соопштија дека вчера биле насочени кон 73 локации во главниот град Сана, околу пристанишниот град Ходеида и три други региони.
Велика Британија и САД ги бранеа нападите, кои означија голема ескалација во блискоисточната криза, предизвикана од војната меѓу Израел и Газа, но беа осудени од регионалните лидери за поттикнување тензии во и онака нестабилната клима.
Хутите во Јемен се поддржани од Иран, а САД го обвинија Иран дека е „длабоко вклучен во планирањето на операциите против трговските бродови во Црвеното Море“. Нападите на Хутите врз бродови во Црвеното Море траат од ноември, како реакција на израелската офанзива во Газа.
Синоќа британскиот министер за одбрана Грант Шапс упати предупредување до лидерите во Техеран.
-Морате да ги натерате бунтовниците Хути и другите да дејствуваат како ваши полномошници, како либанскиот Хезболах, што е очигледен пример, и некои организации во Ирак и Сирија, да престанат и да се откажат бидејќи на светот му снемува трпение – изјави Шапс за Дејли Телеграф.
