Маргарита Симонјан, главна уредничка на руската телевизија „Раша тудеј“ и еден од водечките провладини пропагандисти, изјави дека Русија има проблем со муницијата и ги повика Русите барем по два часа дневно да работат доброволно на производство на муниција.
Симонјан ова го изјави во неодамна емитувано ток-шоу на руската државна телевизија.
– Недостигот од муниција несомнено постои. Не секаде, но постои. Ова не треба да се случува. Треба да има доволно муниција за сите – и за Вагнерците и за редовната војска, за сите. Треба да има и вишок муниција, за да не мора воопшто да размислуваат за тоа. Русија и СССР се соочуваат со овој проблем во секоја војна – рече уредничката на „Раша тудеј“.
Таа даде и свој предлог како да се реши недостигот со муниција.
– Ова не треба да се случува. Нашите момци ги ризикуваат своите животи секој ден, а ние седиме овде дома. Ако нашата индустрија не може да се справи со овој проблем, ајде да се собереме. Прашајте некого, нели сите сме подготвени? Дојдете да помогнете два часа после работа – рече таа.
