Унгарија нема да ги поддржи санкциите на Европската унија против рускиот нуклеарен сектор, најави унгарскиот премиер Виктор Орбан во интервју за унгарското радио Кошут. Будимпешта и Москва соработуваат на полето на производството на нуклеарна енергија.
Унгарскиот премиер Виктор Орбан најави дека Будимпешта нема да се согласи на санкции против Русија кои ќе вклучуваат нуклеарна енергија. Украина неодамна повика на санкции кои ќе ја опфатат и руската државна нуклеарна компанија Росатом, а такви санкции поддржаа и Литванија, Латвија, Естонија и Полска.
Санкциите против Росатом се неприфатливи за Унгарија главно поради тоа што земјата соработува со Росатом. Унгарската нуклеарна централа Пакс, која произведува околу половина од електричната енергија во земјата, има инсталирани четири помали руски реактори VVER 440 и своето нуклеарно гориво го добива од Русија. Договорот меѓу Будимпешта и Москва од 2014 година предвидува натамошно проширување на Пакс со уште два руски реактори ВВЕР, што значително ќе го зголеми капацитетот на електраната.
Целата инвестиција се очекува да чини приближно 12 милијарди евра, од кои 80 отсто ќе бидат покриени со рускиот заем, пренесува полската новинска агенција ПАП.
„Нема да дозволиме спроведување на план кој вклучува санкции во областа на нуклеарната енергија“, изјави Орбан за унгарското радио Кошут. Меѓу другото, како што јави агенцијата ПАП, тој исто така рекол дека за неговиот „успех на преговарачката маса, многу е важно јасно да се стави до знаење дека не е премиерот на Унгарија тој што има проблем со санкциите, туку целиот народ, кој е обединет против нив“.
Според него, Унгарија исто така нема да поддржи никакви санкции кои би ја зголемиле инфлацијата, додаде тој. Во декември инфлацијата во Унгарија изнесува 24,5 отсто, што е највисока во целата Европска унија. Сепак, според Орбан, таа треба да почне да се намалува во февруари или март и би можела да се врати на едноцифрена до крајот на годината.
Да потсетиме, Унгарија во последните месеци честопати не сакаше да воведе европски санкции против Русија – на пример, ембаргото за увоз на нафта и санкциите против рускиот патријарх Кирил. Покрај тоа, таа често ги критикуваше санкциите, велејќи дека тие не успеале значително да ја ослабат Русија.
