Уметницата од Шпанија Алисија Фрамис има намера да се омажи за холограм создаден од вештачка интелигенција (АИ). Идниот сопруг на Фрамис е дигитален ентитет создаден со холографска технологија и машинско учење. Таа ќе стане првата жена што ќе се омажи за холограм генериран од вештачка интелигенција.
Веќе резервирала место за нејзината венчавка. Церемонијата ќе се одржи оваа година во музеј во Ротердам, објави „Еуроњуз“.
Според Фрамис, името на нејзиниот иден сопруг е Аилекс (AILex). Холограмот е нејзин дизајн, создаден да ги задоволува сите нејзини емоционални потреби. Таа го опишува својот виртуелен партнер како „средовечен машки холограм со сложена логистика“.
Бракот на Фрамис не е романтичен, туку дел од нејзиниот нов проект наречен „Хибриден пар“, во кој таа сака да експериментира со границите на љубовта, интимноста и идентитетот во ерата на вештачката интелигенција.
„Вештачката интелигенција сè уште е тесно поврзана со науката и нема поезија, уметност и топлина“, објасни г-ѓа Фрамис на нејзината веб-страница.
„Сакам да направам уметнички документарец кој вклучува цртежи, интервјуа со други жени, скици за тела, раце, романтични соништа, домашни ситуации и секојдневниот живот на мојот партнер. Сакам да истражам како да го интегрирам холограмот во мојот секојдневен живот. “, додаде таа.
Фрамис моментално го дизајнира својот венчален фустан и ја одредува облеката на оние што присуствуваат на церемонијата. Свадбата ќе се одржи летово на покривот на музејот „Бојманс ван Бојнинген“ во Ротердам, како што пишува „Еуроњуз“.
На нејзиниот профил на Инстаграм, г-ѓа Фрамис споделува видеа и фотографии на кои се појавува со нејзиниот партнер Аилекс.
„Љубовта и сексот со роботи и холограми се неизбежна реалност. Тие се одлични придружници и способни се да изразат емпатија. Tелефоните нѐ спасија од осаменоста и ја пополнија празнината во нашите животи, па и холограмите, како интерактивни присуства во нашите домови, стигнуваат уште подалеку.
Мојата пријателка е вдовица и тешко ѝ е да го замени својот сопруг. Вештачката интелигенција и човечките придружници можат да бидат добра опција за оние на кои им треба друштво. Се појавува нова генерација на љубов, сакале ние или не. Луѓето ќе се венчаат и ќе одржуваат врски со холограми, аватари, роботи и слично“, објасни таа.
