Украинскиот претседател Володимир Зеленски вели дека размислува за поставување „воени команданти“ во регионот Курск, „ако е потребно“, пишува Би-Би-Си.
На состанокот што Зеленски го одржа со владини претставници претходно денеска, тој рече дека разговарале за клучните прашања за областа по упадот на Украина, имено безбедноста и хуманитарната помош. Во објава споделена на Фејсбук, надворешно, Зеленски нагласува дека „Украина се брани себеси и животите на својот народ“, но дека строго ќе го следи меѓународното право.
Исто така, Украина вели дека создава „безбедносна зона“ во Курск, во обид да ги заштити сопствените погранични области. Ова на Телеграм го обзнани украинската вицепремиерка Ирина Верешчук.
Таа вели дека Украина ќе организира хуманитарна помош за руските цивили во областа на безбедносната зона и дека ќе отвори коридори за евакуација кон Русија и кон Украина.
Официјален Киев соопшти дека Украина освоила нови територии во Курск, каде што заробила дополнителен број руски војници и уништила авион.
Командантот на украинската армија, Олександр Сирски, во видео објавено на Телеграм изјави дека украинските сили напредувале еден до два километри во некои делови на Курск. Сирски додаде дека украинските сили денеска заробиле над 100 руски војници кои ќе бидат заменети за украински затвореници.
Украинската армија, исто така, уништила руски авион Су-34, кој бил користен за напади на позиции и градови во Украина.
Портпаролот на украинското Министерство за надворешни работи вчера изјави дека Киев нема намера да окупира руска територија, туку целта е да се спречат ракетни напади од Курск врз Украина. Офанзивата ќе заврши кога ќе заврши војната во Украина.
Гувернерот на пограничниот руски регион Белгород прогласи вонредна состојба во својата област.
Западните медиуми пишуваат за можниот одговор на Владимир Путин на украинската офанзива.
