Украина испрати повеќе од 100 дронови над Русија како одговор на руското гранатирање на украинска територија. Според податоците, над областа Брјанск се соборени 45 дронови, а во Воронеж како последица од нападот избувнал пожар во кој едно лице е повредено. Во меѓувреме, руските сили известуваат за нови движења во источна Украина.
Руските сили во еден ден соборија вкупно 109 беспилотни летала. Покрај областа Брјанск, неколку од нив беа соборени и над Белгород, Тамбов и Курск, пренесува француската новинска агенција АФП.
Во рускиот град Воронеж едно лице е повредено кога украински дрон запалил пожар во индустриска зграда, соопшти гувернерот на истоимениот регион Александар Гушев.
Според Киев, нападите со беспилотни летала се одговор на руското гранатирање на украинска територија.
Во меѓувреме, руските сили известуваат за нови движења во источна Украина. Тие ја презедоа контролата врз селото Измајливка, кое го нападнаа веќе во август.
Селото, кое пред војната имало помалку од 200 жители, е на осум километри од украинскиот индустриски град Курахове и на само неколку километри од линијата на фронтот.
Во неделата, украинската армија извести за најмалку 142 напади на руските сили, од кои повеќето беа одбиени.
На фронтот, руските војници во последните денови зазедоа неколку мали села. Руските воени блогови пишуваа за колапсот на украинскиот фронт на југот на регионот Доњецк. Сепак, информациите дадени од двете страни тешко се проверуваат, предупредува германската новинска агенција dpa.
