Руската воздушна одбрана ноќеска собори 31 украински беспилотно летало над нејзина територија, соопшти денеска Министерството за одбрана во Москва. Во меѓувреме, бројот на загинатите од неделниот украински ракетен напад врз пограничниот регион Белгород се искачи на 15.
„Ноќе беа спречени нови обиди на режимот во Киев да изврши терористички напади со помош на беспилотни летала (…) врз цели на територијата на Русија“, напиша руското Министерство за одбрана во објавата на мрежата Телеграм.
Во него се објаснува дека 12 беспилотни летала биле соборени над Белгородската област на границата со Украина, која била цел на украински ракетен напад во неделата. Според последните податоци, во уривањето на станбената зграда загинале 15 лица. Други осум беспилотни летала беа соборени од руската противвоздушна одбрана над пограничниот регион Курск, четири над соседниот регион Липек, а седум беспилотни летала и четири ракети „невреме“ над полуостровот Крим, кој Русија го анектираше во 2014 година.
Украина, која во последните денови се соочува со руска копнена офанзива во источниот регион Харков, во последните месеци ги засили нападите врз цели на руска територија.
