Претседателот на СОНК, Јаким Неделков денеска на прес-конференција посочи дека штрајкот е ставен во мирување, а тоа значи дека утре во училишните клупи се враќаат основците и средношколците.
Причина за ваквата одлука на СОНК е добиеното известување од Министерството за труд и социјална политика за мирно решевање на работните спорови. Како што вели тој, денеска Советот на СОНК расправал во врска со добиеното известување, по што се консултирале со правници.
– Советот на СОНК и СОНК се легалисти и се за почитување на законите, од таа причина дел од одредбите водат кон тоа дека додека траат периодот на помирување и решавање на спорот меѓу двата спротивставени табори, доколку се работи за штрајк истиот оди во мирување – истакна Неделков.
Тој потенцираше дека максималниот период за помирување меѓу двата табори е околу 20 дена, првиот рок е од десет дена, па доколку една од страните не е задоволна од преговорите може да побара дополнителни 10 дена за преговори. Доколку во овој период не се реши спорот кој го имаат, штрајкот повторно ќе биде активен.
Неделков изрази надеж дека платите ќе бидат зголемени, дневниците за време на штрајкот нема да бидат скратени и дека колективните договори ќе бидат потпишани и утврдени со рокови.
