Учениците од основното училиште „Лазо Ангеловски“ и денеска не отидоа настава со што продолжи бојкотот поради насилното однесувањето на 8-годишиот соученик.
Родителите бараат Министерството за образование да спроведе стручна анализа за состојбата на ученикот и на неговото семејство. Според нив, со ученикот е неопходно да работат специјалисти, а неговото враќање на редовна настава да се дозволи само по добивање документ кој што ќе потврди дека неговото однесување е подобрено и дека не претставува закана за безбедноста на соучениците и на вработените.
Министерката за образование Весна Јаневска денеска изјави дека веќе се работи тимски со повеќе институции за решавање на проблемот со насилното дете од ОУ „Лазо Ангеловски“.
– Во тимот се вклучени Министерството за образование, Министерството за здравство, Министерството за социјала, демографија и млади и го решаваме проблемот. Дозволете неколку дена да дојдеме до најсоодветното решение – рече министерката.
Според неа, се предвидуваат подлабоки и посериозни активности и постапки кои ќе бидат во корист на детето и на решавањето на целиот случај.
Министерката Јаневска не откри дали родителите на проблематичниот ученик соработувале со надлежните.
– Не може цела македонска јавност да го стигматизира детето. Ве молам дајте ни време, да имаме извесен период и ќе го решиме случајот – кусо одговори Јаневска.
Инаку вчера од Министерството за образование и наука (МОН) информираа дека е формирана интердисциплинарна комисија за разгледување на ситуацијата. Во неа учествуваат претставници од МОН, Бирото за развој на образованието, Државниот просветен инспекторат, општината, училиштето и социјалните служби.
„Фокусот е на најдобрите интереси на ученикот, но и на сите инволвирани страни. Комисијата разгледува соодветни мерки и активности согласно законската регулатива“, соопштија од МОН.
По вчерашната средба на Комисијата било одлучено третоодделенецот да се врати на училиште, но со скратено време на престој, како дел од препораките за негово постепено интегрирање во училиштето. Понатаму, според проценките, тој ќе може да ја продолжи редовната настава.
Дополнително, Министерството за труд и социјална политика изрече мерка за зголемен родителски надзор, додека Заводот за ментално здравје ќе изврши детална процена на детето. Целта е да се утврдат најсоодветните методи за работа со него и подобрување на неговото однесување.
Според информациите од вчера родителите од Советот не се сложиле со сите мерки, па затоа денеска беше продолжен бојкотот на наставата.
