Утрово во ноќен клуб во Загреб убиен е Томислав Сабљо, водач на криминален клан во Хрватска.
Починатиот бил застрелан со огнено оружје, а повеќе детали засега нема бидејќи во тек е увидот на лице место и тече истрагата.
Познато е дека на убиството му претходела физичка пресметка меѓу повеќе лица.
Веќе е уапсен маж кој се поврзува со инцидентот и тој е под полициски надзор.
Сабљо бил застрелан до смрт околу 4 часот и 40 минути во ноќниот клуб „Риц“ по физичка пресметка меѓу неколку лица, а медиумите јавуваат дека бил застрелан од чувар на ноќниот клуб.
Мирослав Топиќ, началник на одделот за крвни деликти на полицијата во Загреб, на прес-конференција рече дека во тек е кривична истрага за да се утврдат сите околности и можниот мотив, а поради брзата реакција на полицијата, осомничениот за убиството бил пронајден на местото на настанот, а тој не пружил никаков отпор.
Санди Пего, косопственик на „Риц“, за весникот „Данас“ го коментирал убиството во неговиот клуб:
– Во овој момент можеме само да изразиме жалење за немилиот инцидент што се случи синоќа. Полицијата ги утврдува фактите и околностите во кои соработуваме со нив. Кога ќе биде готов, очекуваме официјална комуникација од полицијата – изјавил Пего.
Убиениот бил обвинет во акцијата Тебра, како еден од водачите на криминална организација која шверцувала дрога, палела автомобили итн.
Сабљо и 19 други лица кои се поврзани со синџирот на шверц на дрога од Албанија и Црна Гора, преку Босна и Херцеговина до Хрватска, беа уапсени во јули 2019 година во голема полициска акција.
