Обвинителството на Босна и Херцеговина во понеделникот побара од државниот суд да им одреди притвор на четворицата илегални мигранти од Авганистан, кои беа уапсени минатата недела долж границата со Хрватска, каде што беа вооружени во импровизирани кампови.
Обвинителството на БиХ потврди дека еден од уапсените, Вазири Басир (31), претходно бил осуден на шест месеци затвор во Србија поради злоупотреба на дрога.
Заедно со него се уапсени Ахмад Нисар (18), Авганистанецот Билал (20) и Абдул Кајум Фаќири (29).
„Осомничените се под истрага за заговор за извршување кривични дела и неовластена трговија со оружје и воена опрема“, се вели во соопштението за печатот на Обвинителството на БиХ.
Припадниците на граничната полиција на БиХ и на Државната агенција за истраги и заштита (СИПА) ги открија минатата недела во близина на граничниот премин со Хрватска во близина на градот Свилај на брегот на Сава.
Од Обвинителството наведуваат дека досега собраните докази укажуваат дека пронајденото огнено оружје и муниција планирале да го прошверцуваат во Хрватска.
Истрагата се уште е во тек за да се утврдат сите околности за престој на вооружени мигранти на подрачјето долж границата на Босна и Херцеговина и Хрватска бидејќи, како што посочуваат од Обвинителството на Босна и Херцеговина, во досегашните активности на Агенциите за спроведување на законот во Босна и Херцеговина, вооружените членови на мигрантското население главно не биле евидентирани, особено не оние кои поседувале автоматско оружје.
